ای رستم رودابه به ایرون خوش اُوِیدی

شعری به گویش بختیاری در ستایش «نواب نصیر شلال» قهرمان بختیاری تبار وزنه برداری المپیک 2012- با صدای شاعر

ای رستم رودابه به ایرون خوش اُوِیدی

http://setin.se/2012/MUSIK/koroush_kiani.mp3

 سردار سرافراز دلیرون خوش اُوِیدی

از پیر و جوون گو و دَدو وِیدِنه سِیلِت

 مِن وار خوت، ای بیشه ی شیرون خوش اُوِیدی

 تو گُردی و یاد آور شیرون دلیری

 چی زرده و تاراز و دلا سفت و سویری

 گردن شَق و کد بسته و منت نپذیری

 از نسل به جا منده ی کوروش کبیری

 کردی مِنه دنیا نـُم ایروننه هی جار

 تشماله بگوین هفت شو و هفت رو بکنه کار

 نوابی و از طایفه ی رستم زالی

 از گویَل بی باک نصیرونِ شلالی

 ای گو تو که چی چشمه ی او دیمه زلالی

 آستاره ی بخت همه ی مردم مالی

 داس مهی و بِرچ  اِزَنی من دل شو گار

 تشماله بگوین هفت شو و هفت رو بکنه کار

 اجداد تو اسکندرنه خین به جیَر کِرد

 اعرابنه ایل مو از ئی خاک به در کرد

 چنگیزنه باوایَلمون خاک به سر کرد

 نادر به ور گُرز مو از قلعه گذر کِرد

 سی خاطره ی گوگَریا پاری و پیرار

 تشماله بگوین هفت شو و هفت رو بکنه کار

 تشماله بگوین هُف کنه قایِم مِنه کرنا

 تا کُرگَـل چوباز ورستِن همه وا پا

 ویده یلِ چوغا به وری با کد و بالا

 سرپنجه ی ایرونه نشون داده به دنیا

 از نسل اسدخونه و صیداله و سردار

 تشماله بگوین هفت شو و هفت رو بکنه کار

 تا پرچم ایرونه نهادی سر شونت

 رهده منه تاریخ وُلله اسم و نشونت

 از دیمه و تاراز و دلا تا جَلِکونت

 برنو سر شون، گاله زنون وِینه گَگونت

 با یاد شهیدون وطن بی نـُم و نـُم دار

 تشماله بگوین هفت شو و هفت رو بکنه کار

 خینی که منه لاش تو دایم ازنه جوش

 از تختی و بابک رِسه تا خین سیاووش

 کی غیرت سردار اسعد ایبووه فراموش

 بارون، تش آتشکده نه نیکنه خاموش

 ایل مو نِها تش به مِنه حونه ی قاجار

 تشماله بگوین هفت شو و هفت رو بکنه کار

 ای یاد قدیما که پیایَل همه یل بین

ای یاد قدیما که پیایَل همه یل بین

 مینا لچکا حجب و حیا تُرنه و پَل بین

 دارا ثمری سر به زمین وَنده و خَل بین

 حورجین دل دالویَلمون پر ز مَتَل بین

 سی خاطره ی عشق خدا بس و خدایار

 تشماله بگوین هفت شو و هفت رو بکنه کار

 مردم به تو نازن که بنازی تو به ایرون

 تا بیشه ای از شیر بسازی تو به ایرون

———————————————-

سراینده: کورش کیانی قلعه سردی

برگرفته از سایت: sherekoorosh.mihanblog.com